Fyrsta jólalagið og gamlar minningar

Það hefur nánast skapað hefð fyrir því að ég tjái mig um fyrsta jólalagið sem ég heyri í desember. Þar sem ég hef ekki ennþá heyrt  "uppáhalds" jólalagið verð ég eiginlega að halda upp á það.

Fyrsta jólalagið þetta árið var umsnúningur á lagi sem ég held að heiti "You lost that loving feeling" á frummálinu. Þetta lag er sungið af ofurkarlmannlegri röddu og fjallar um andlegt öngstræti manns sem hefur misst ást sinnar heittelskuðu. Íslenska útgáfan er ekki nærri eins sjarmerandi en sú upprunalega en ég fæ samt nettan unaðshroll við að heyra það.

Frumútgáfan var nefnilega á spólu sem pabbi keypti á Bjargi (Mýv) snemma á níunda áratugnum. Við vorum á leið til Eiða og hugmyndin var að kaupa smá tónlist til að lina þjáningar fjölskyldunnar næstu klukkutímana.

Pabbi keypti 2 spólur. Þessa, "The best of the 60's" eða eitthvað og svo einhverja safnspólu með ýmsum nýjum smellum á borð við "Tími til að tengja" með Skriðjöklum og "Touch Me" með Samantha Fox.

Og svo brunuðum við af stað í sólinni og hitanum. Bráðum varð skyggnið afturí nánast ekkert og góðir frasar ein og "Þetta er Hrossaborg" og "Valdís þarf að æla" heyrðust. En þessi fjárfesting hafði gríðarleg áhrif á bílferðir næstu ár (örugglega svona 10 ár, ótrúleg ending í þessum spólum) og tónlistarupplifun okkar systra.

En alla vega...

gleðilegan desember!

Athugasemdir

[Edda Rós (IP-tala skráð) 1.12.2007 kl. 18:13]

Ég held að það hafi verið æðislegt að sjá mig á þessum ferðalögum, pínulitla syngjandi "töts mí töts mí, Æ wanna fíl jor boddý..." sem var annað uppáhaldslagið mitt (hitt var við skulum ríða, enn sú blíða, framhjá (einhverju))

Edda 

[Valdís (IP-tala skráð) 1.12.2007 kl. 21:30]

Já, ég man eftir þessum spólum og "ég sé um hestinn, þú sérð um hnakkinn" var á íslensku spólunni. Spólan hét örugglega "Þetta er náttúrulega bilun" og var með frekar fyndinni mynd á hulstrinu.

[Pabbi (IP-tala skráð) 3.12.2007 kl. 13:13]

Þetta hefur greinilega verið góð fjárfesting. Ótrúlegt hveð situr eftir í minningunni þegar allt hið innihaldslausa og ómerkilega hefur verið síað frá.

Pabbinn

[Valdís (IP-tala skráð) 3.12.2007 kl. 18:32]

Ég fann lagið! Auðvitað var það Baggalútur!

http://www.baggalutur.is/jol/2007.php 

[Elva Guðmundsdóttir, 3.12.2007 kl. 19:11]

Já, ég heyrði lagið aftur í dag og þóttist kannast við kveðskapinn! Og aftur ná þeir að fanga jólaandann, piltarnir.